صديقي حفار القبور كان دعاني منذ عدة أيام, لأن أذكر أسباب حبي للدنيا, ومتى أضبط نفسي متلبساً بحبها؟!, واليوم أقوم أنا بهجمة مرتدة عليه وعلى الدنيا, لأبين للدنيا متى أكون مخنوق منها, وحين أشعر أنها لو كانت رجلاً لقتلته….
وياسادة يا كرام أكون مخنوق من الدنيا في الحالات ألآتية (حينها ممنوع الاقتراب أو اللمس)
-الظلم من أي شخص, فلا أتذكر أني أبكي إلا عندما أكون مظلوم….
-الضجيج, أكره الصوت العالي ((ومحبش حد يكلمني وهوا بيزعق))
-الكذب, أمقته وأمقت من يمارسه معي ولو مرة واحدة.
-عدم استطاعتي حفظ ولو جزء من القرءان.
-مخالفة المواعيد, فكر مرة أنت تخلف معي ميعاد, فسأعتبرك من أعدائي فوراً, إلا إذا كان لديك عذر مقبول.
-الخيانة, الخونة دول لازم يتعدموا.
-عند بكاء طفل وخصوصا لو الواد محمود ابن أختي..
-عندما تمطر الدنيا وأنا نائم.
-لما أسمع القادة العرب وهما بيتكلموا عن فلسطين والعراق.
-لما أشوف كمال الشاذلي وزبانية الحزب الوطني في التلفزيون.
-لما حد يزعل مني وأكون أنا الغلطان.
-عندما يكون الامتحان (وسهل جداً) أطول من وقت الإجابة.
-لما أشوف حال مصر.
-واحد أقوله سلام عليكم يرد أهلاً وسهلاً إتفضل!.
-لما أسأل نفسي أنا عايش ليه ومعرفش.
-ابتعادي عن القراءة منذ فترة.
-بتخنق جدا جدااً من الحر.
-لما برنامج العاشرة مساءاً ييجي عشرة وعشرة.
-أكتب موضوع أقول أنه هيكسر الدنيا, وألاقي “نو كومينت”.
-لما جمال بيه مبارك يقول إنه مش ناوي يقبل الورث.
-لما أدخل على الماسنجر ولاقي الناس اللي عايز أكلمهم أوف لاين.
-بعد أن أقرأ رواية أو قصة أو أشاهد فيلم ويكون ناقص وله تكملة وهي ليست عندي.
-آجي أذاكر النور يقطع, وآجي أستحمى المية تطلع سقعة, وألبس الجزمة ألاقيها مش نضيفة, وأشغل الكمبيوتر ألاقي الويندوز وقع, وأفتح المدونة ألاقي النت فاصل.
-أكون ماشي في الطريق واالي جنب “يبصق” برطيقة وحشة….(يع).
-أركب الميكروباص وألاقي السواق مشغل شريط صوته عالي وكمان لشعبان.
-غبي ومعندوش إستعداد يفهم ومضطر أتعامل وياه.
-آكل من إيد حد مبحبوش.
-بعد ما آكل افتكر إني ما قلتش “بسم الله”.
-يخنقني جداً أنني لم أمش في مظاهرة حقيقة طوال حياتي.
-هيفاء وأخواتها…..
-النتيجة آخر السنة سودا بعيد عنكم (مش عشاني والله عشان الناس اللي في البيت).
-وفي آخر اليوم لما آجي أنام, وأسأل نفسي لو مت دلوقتي يبو حميد هتخش الجنة ولا النار؟, وأقول هخش النار.
ودلوقتي أمرر الدنيا الخنيقة للناس دول ((حفار القبور, منار, عمو سامي, أبيه يحيى, تامر, أحمد بيه شوكير,بنت مصرية, شريف بتاع قلم جاف, وهش هشام, وآدم باشا المصري,وشادي العواطلي ,والسيد طه)) وكل الناس اللي لولا الامتحانات كنت افتركتها…..
ليست هناك تعليقات:
إرسال تعليق