الأحد، فبراير 12، 2006

جاحد وناكر للجميل...(يبقى أنا)ه


عندما قرأت أن ممتاز القط قال بأخبار اليوم السبت الماضي أن من ينكر أن الفكر الجديد داخل الحزب الوطني كانت القوة المحركة لحالة الحراك التي عاشتها مصر
عندها فقط عرفت من أنا
فأنا بالفعل يا سيد ممتاز جاحد وناكر للجميل كمان, ولو دققت في شكلي ستجد علامات الجحود ونكران الجميل بارزة كما هي أنفي بارزة على شفتاي
فرغم كل إنجازات حزبك الموقر وفكره الجديد وحالة الحراك والرجرجة التي سببتها لي ولغير من المصريين فإنها وللأسف لم تغير من صفاتي القبيحة........ه
فأنا جاحد...رغم افتتاح السيد رئيس حزبكم كوبري كل يومين
وأنا جاحد...لأنني من السادة المتنطعين المتبطلين من جراء سياستكم المهلبية
وأنا جاحد....لأن موكب رئيس حزبكم لا يعطل تافه مثلي ومثل آلاف غيري من الشعب حتى يمر سيادته
وأنا جاحد....لأنني أصبت نفسي بالسرطان نتيجة لما نأكله نحن
وأنا جاحد....لأنني أنهيت تعليمي ولم أفهم شيئاً مما درسته
وأنا جاحد....لأنني عايز أشتغل وعايز أتجوز وعايز شقة يعني داخل على طمع
وأنا جاحد....لأنني بركب سفن واسمها السلام 98 ,وتصدقوا فعلاً أنا جاحد واستاهل؛ بأنا إيه اللي رجعني من بلاد بره
وأنا جاحد....لأنني مش عايز إنجازات سيادته الرهيبة تستمر فينا عن طريق ابنه اللي عايز يورثنا كأننا عزبة أبوه
وأنا جاحد....لأنني عايز أروح أنتخب ومحدش من البلطجية يضربني ولا يموتني
وأنا جاحد...لأنني لما السما بتمطر حبتين الشوراع بتغرق والطرق بتتسد وأنا معنديش دم وعايز أروح شغلي
وأنا جاحد...لأنني رغم كل إنجازات سيادته الرهييييييييبة
لسه عايش وممتش

هناك 4 تعليقات:

غير معرف يقول...

إتصدق يا جدع إن أنا كرهت من الكلام اللي إنتا قلتة ده!!!!
طب و كتاب القراءة أنا كرهتك لأني قريت اللي أنا مش عايز أشوفو في نفسي ...بقى بعد العمر ده الاقي نفسي أنا كمان جاحد و أنا مش واخد بالي؟؟ يا نهار بمبا اللهم كتر الجاحدين أمثالنا

حائر في دنيا الله يقول...

تصدق ياللي معرفش إسمك إنتا
أنا اكتشفت إن غالبية الشعب المطحون بتاعنا
جحدة وناكرين لجميل الحزب الوطني

tamer يقول...

عزيزى حائر

الحزب الوطنى ورجالة لن يسمعون ولن يشاهدون ولن يفهمون سوى ما يريدون هم


والشعب والناس اللى بتكلم وتقول عايزين اصلاح بجد

عايزين هواء نقى وعايزين

هما يرد عليهم الحزب اللى يقول يقول انا بكلامكم مش مشغول لانى واثق من الاصلاحات اللى بعملها وانتم ناكرين الجميل
.
اشكرك على المشاركة وصدقنى البلد دى عايز تغير شامل فى كل حاجة
عشان السلبيات الكتير اللى فيها والحزب المصون سببها طبعا

الى الا مام

daktara يقول...

الاستاذ حائر في دنيا الله , وكلنا معاه
انا موقعي هذا امام شاشة الكمبيوتر باعلن اني سافل وقليل الادب وجاحد وناكر الجميل كمان
ازاي انا انكر انجازات الحكومات كلها من اول حكومة الواق واق لحد الحكومة التركتوتية
مانا زي الفل وعندي كمبيوتر ونت وبعرف اقرأ واكتب وبيضيع مني ساعة واحدة بس يوميا في المواصلات
وباتعالج في مستشفيات هي الاحدث في الشرق الاوسط وكل حاجة باستعملها او باكلها هي الافضل في العالم
ده حتي كفاية علي كل يوم كتابات رئيس التحرير النابغة ممتاز الكلب
ده حتي يكفي انجازه الخرافي , فبعد ماكانت اخبار اليوم هي الجريدة الحكومية الافضل عندي والاقل نفاقا
تحولت بفضل سيادتة الي جريدة النفاق الاولي
وياريت تقرأ مقاله بعنوان (( ست الكل)) اللي اتنشر بعد الانتخابات البرلمانية
وكمية النقد والتجريح والتهزيق اللي وجهم للمستشارة نهي الزيني علشان شهدت شهادة حق
وبعدين تبقي تقلي رايك, وسلام