الاثنين، يونيو 20، 2005

تيجي منلعبش شعب وحرامية..!


بقالنا ييجي تلاتين أربعين سنة عمالين بنلعب شعب وحرامية .. هوا إحنا إيه مزهقناش ... نفسي أغير اللعبة وألعب دور الحرامي .. يعني بلاش ألعب دور الظابط ... وأتعاون مع الحرامية وأي حد من الشعب يتكلم أضربه على قفاه ... هو كده , مش هضرب غير على القفا ... وأنا حر بقه في قفا الشعب بتاعي ... أصل أنا لو لعبت دور الحرامي ممكن ييجي يوم والكبير بتاعنا يزهق مني ويرميني للظابط كبش فداء (حلوة صح) عشان حرامي أكبر مني ميتكشفش وكمان عشان اللعبة يبقى فيها متعة ,

الشعب يتسرق , وشوية من الحرامية يهربوا , وشوية من الحرامية يضربهم الظابط على قفاهم ويدخلهم السجن , وأهو منه يبقى فيه تجديد دماء للحرامية وتغيير وجوه ,
طب أنا لو بقيت حرامي آخذ أي دور ... بقول دور رئيس بنك كويس , لا لا بعد ما الحرامية اللي هياخدوا فلوس الشعب يهربوا هتزنق أنا عند الظابط تاني ويديني على قفايا ,

بلاش دور رئيس بنك ..
خلاص أبقه رئيس مجلس إدارة وأبقه رئيس تحرير جرنان قومي واهو يبقى شكلي عاطفي وكل يوم أنزل في الجرنان ويبقى اسمي بالبنط العريض وكمان أخلي ولادي يكتبوا عندي في الجرنان وأسمسر على الإعلانات , على شوية برامج على شوية نفاق يومي وحبة تسقيف أبقى مية مية , وكمان كل حبة هروح أمريكا وفرنسا وبريطانيا وحتى بلاد الواق واق مع الريس ومنتيش غرمانة حاجة يا سميرة وأهو كله على قفا البلد , بس برضه المعارضة ولاد الأحبة هيقولوا عليا منافق وهيتريقوا عليا ويفضحوني في "الدستور" ... خلاص بلاها سامية أقصد بلاها رئيس تحرير خليها وزير قووول رئيس وزرا .. تمام حاجة أبهه وبرضة الرحلات هتكتر والجرايد هتتكلم عني كل يوم وهيبقى ليا حرس وموكب وبرضه هروح أمريكا وأي حتة مزاجي فيها وهروح شرم الشيخ 9 أيام في الأسبوع , بس المشكلة أنه كل كم سنة لازم رئيس الوزراء يتغير وهيبقى شكلي وحش قدام المدام لما تلاقيني مبروحش شرم الشيخ ولا حتى مارينا ولما يشيلوا الحرس وكمان لما يشيلوا الزرع اللي قدام البيت والشارع يرجع وسخ من تاني ... لا لا أقولك مبدهاش هيا الراس الكبيرة .. أيوا الريـ..
ولم أكمل الكلمة حتى وجدت قفايا بيطرقع ... قوم يالا أنت فاكر نفسك فين .. قوم سيادة اللوا عايزك ... طب معلش يجماعة هرجعلكم كمان شوية أصلي كنت ماشي في مظاهرة إنبارح سلام.

هناك تعليقان (2):

Mr-Biboooo يقول...

رئيس جمهورية حته واحدة طب قول حرم الرئيس
عموما ربنا يفك سجنك

حائر في دنيا الله يقول...

حررام عليك يراجل...